ਨਗਰ ਨਿਗਮ ਲੁਧਿਆਣਾ ਦਾ ਨਤੀਜਾ 27 ਨੂੰ
ਲੁਧਿਆਣਾ, 24 ਫਰਵਰੀ ( ਸਤ ਪਾਲ ਸੋਨੀ ) : -ਨਗਰ ਨਿਗਮ ਲੁਧਿਆਣਾ ਦੀ ਆਮ ਚੋਣ ਅਤੇ ਨਗਰ ਕੌਂਸਲ ਜਗਰਾਂਉ ਅਤੇ ਪਾਇਲ ਦੇ ਇੱਕ-ਇੱਕ ਵਾਰਡ ਦੀ ਉੁਪ-ਚੋਣ ਲਈ ਵੋਟਾਂ ਪਾਉਣ ਦੀ ਪ੍ਰਕਿਰਿਆ ਅੱਜ ਅਮਨ-ਅਮਾਨ ਅਤੇ ਸ਼ਾਂਤੀਪੂਰਵਕ ਤਰੀਕੇ ਨਾਲ ਨੇਪਰੇ ਚੜ ਗਈ। ਵੋਟ ਪ੍ਰਕਿਰਿਆ ਦੌਰਾਨ ਜਿੱਥੇ ਲੁਧਿਆਣਾ ਦੇ 95 ਵਾਰਡਾਂ ਲਈ 59.08 ਫੀਸਦੀ ਵੋਟਿੰਗ ਦਰਜ ਕੀਤੀ ਗਈ, ਉਥੇ ਹੀ ਨਗਰ ਕੌਂਸਲ ਦੇ ਜਗਰਾਂਉ ਦੇ ਵਾਰਡ ਨੰਬਰ 17 ਤੋਂ ਭਾਰਤੀ ਜਨਤਾ ਪਾਰਟੀ ਦੇ ਉਮੀਦਵਾਰ ਅੰਕੁਸ਼ ਧੀਰ ਨੇ ਕਾਂਗਰਸ ਪਾਰਟੀ ਦੇ ਮਦਨ ਲਾਲ ਬਾਂਸਲ ਨੂੰ 782 ਵੋਟਾਂ ਦੇ ਫਰਕ ਨਾਲ ਹਰਾ ਦਿੱਤਾ। ਇਸੇ ਤਰਾਂ ਪਾਇਲ ਦੇ ਵਾਰਡ ਨੰਬਰ 5 ਤੋਂ ਕਾਂਗਰਸ ਪਾਰਟੀ ਦੀ ਪਰਮਜੀਤ ਕੌਰ ਨੇ ਸ਼੍ਰੋਮਣੀ ਅਕਾਲੀ ਦਲ ਦੀ ਉਮੀਦਵਾਰ ਰੀਨਾ ਰਾਣੀ ਨੂੰ 214 ਵੋਟਾਂ ਦੇ ਫਰਕ ਨਾਲ ਹਰਾ ਦਿੱਤਾ। ਨਗਰ ਨਿਗਮ ਲੁਧਿਆਣਾ ਲਈ ਪਾਈਆਂ ਗਈਆਂ ਵੋਟਾਂ ਦੀ ਗਿਣਤੀ 27 ਫਰਵਰੀ ਨੂੰ ਹੋਵੇਗੀ।
ਇਸ ਸੰੰਬੰਧੀ ਜਾਣਕਾਰੀ ਦਿੰਦਿਆਂ ਜ਼ਿਲਾ ਚੋਣ ਅਫ਼ਸਰ-ਕਮ-ਡਿਪਟੀ ਕਮਿਸ਼ਨਰ ਪ੍ਰਦੀਪ ਕੁਮਾਰ ਅਗਰਵਾਲ ਨੇ ਦੱਸਿਆ ਕਿ ਲੁਧਿਆਣਾ ਦੇ ਸਾਰੇ 95 ਵਾਰਡਾਂ ਵਿੱਚ ਸ਼ਾਮ 4 ਵਜੇ ਤੱਕ 59.08 ਫੀਸਦੀ ਵੋਟਾਂ ਪਾਈਆਂ ਗਈਆਂ। ਕੁੱਲ ਪਈਆਂ ਵੋਟਾਂ ਵਿੱਚ ਮਰਦਾਂ ਵੱਲੋਂ 59.70 ਫੀਸਦੀ, ਔਰਤਾਂ ਵੱਲੋਂ 57.66 ਫੀਸਦੀ ਅਤੇ ਤੀਜੇ ਲਿੰਗ ਵੱਲੋਂ 4.17 ਫੀਸਦੀ ਵੋਟਾਂ ਪਾਈਆਂ ਗਈਆਂ। ਵੋਟ ਪਾਉਣ ਦੀ ਪ੍ਰਕਿਰਿਆ ਦੌਰਾਨ ਸਵੇਰੇ 10 ਵਜੇ ਤੱਕ 13.04 ਫੀਸਦੀ, 12 ਵਜੇ ਤੱਕ 30.54 ਫੀਸਦੀ, 2 ਵਜੇ ਤੱਕ 46.15 ਫੀਸਦੀ ਵੋਟਾਂ ਭੁਗਤਾਈਆਂ ਗਈਆਂ।
ਇਸ ਦੌਰਾਨ ਜਗਰਾਂਉ ਦੇ ਵਾਰਡ ਨੰਬਰ 17 ਲਈ ਕੁੱਲ 79.92 ਵੋਟਾਂ ਅਤੇ ਪਾਇਲ ਦੇ ਵਾਰਡ ਨੰਬਰ 5 ਲਈ ਕੁੱਲ 82.30 ਫੀਸਦੀ ਵੋਟਾਂ ਪਾਈਆਂ ਗਈਆਂ। ਜਗਰਾਂਉ ਵਿੱਚ ਜੇਤੂ ਉਮੀਦਵਾਰ ਅੰਕੁਸ਼ ਧੀਰ ਨੂੰ 1379 ਵੋਟਾਂ ਪਈਆਂ ਜਦਕਿ ਮਦਨ ਲਾਲ ਬਾਂਸਲ ਨੂੰ 587 ਵੋਟਾਂ ਪਈਆਂ। ਜਗਰਾਂਉ ਵਿੱਚ 9 ਵੋਟਰਾਂ ਨੇ ਨੋਟਾ ਦਾ ਬਟਨ ਦਬਾਇਆ। ਪਾਇਲ ਵਿੱਚ ਜੇਤੂ ਉਮੀਦਵਾਰ ਪਰਮਜੀਤ ਕੌਰ ਨੂੰ 345 ਵੋਟਾਂ ਪਈਆਂ ਜਦਕਿ ਰੀਨਾ ਰਾਣੀ ਨੂੰ 131 ਵੋਟਾਂ ਪਈਆਂ। ਪਾਇਲ ਵਿੱਚ 3 ਵੋਟਰਾਂ ਨੇ ਨੋਟਾ ਦਾ ਬਟਨ ਦਬਾਇਆ।