ਰੋਜ਼ਗਾਰ ਮੇਲੇ ਦਾ ਵਿਧਾਇਕ ਭਾਰਤ ਭੂਸ਼ਣ ਆਸ਼ੂ ਅਤੇ ਸੰਜੇ ਤਲਵਾਡ਼ ਨੇ ਸਾਂਝੇ ਤੌਰ ‘ਤੇ ਕੀਤਾ ਉਦਘਾਟਨ
ਲੁਧਿਆਣਾ 01 ਮਾਰਚ ( ਸਤ ਪਾਲ ਸੋਨੀ ) : ਪੰਜਾਬ ਸਰਕਾਰ ਵੱਲੋਂ ਘਰ-ਘਰ ਰੋਜ਼ਗਾਰ ਸਕੀਮ ਤਹਿਤ ਆਈਟੀਆਈ ਕੈਂਪਸ ਗਿੱਲ ਰੋਡ ਲੁਧਿਆਣਾ ਵਿਖੇ ਦੂਜੇ ਗੇਡ਼ ਦਾ ਮੈਗਾ ਜਾਬ ਫੇਅਰ ਆਯੋਜਿਤ ਕੀਤਾ ਗਿਆ, ਇਸ ਵਿੱਚ ਨੌਜਵਾਨਾਂ ਅਤੇ ਨਾਮੀ ਕੰਪਨੀਆਂ ਨੇ ਭਾਰੀ ਉਤਸ਼ਾਹ ਦਿਖਾਇਆ।ਇਸ ਮੈਗਾ ਜਾਬ ਫੇਅਰ ਵਿੱਚ ਲੁਧਿਆਣਾ, ਸੰਗਰੂਰ, ਮੋਗਾ, ਪਟਿਆਲਾ, ਖੰਨਾ ਅਤੇ ਹੋਰ ਖੇਤਰਾਂ ਦੇ ਤਕਰੀਬਨ 1912 ਤੋਂ ਵੱਧ ਨੌਜਵਾਨਾਂ ਨੇ ਆਪਣੇ ਆਪ ਨੂੰ ਰਜਿਸਟਰਡ ਕੀਤਾ ਅਤੇ 539 ਨੌਜਵਾਨ ਵੱਖ-ਵੱਖ ਕੰਪਨੀਆਂ ਵੱਲੋਂ ਸਿਲੈਕਟ ਕੀਤੇ ਗਏ। ਜਾਬ ਫੇਅਰ ਮੇਲੇ ਵਿੱਚ 20 ਤੋਂ ਵੱਧ ਨਾਮਵਾਰ ਕੰਪਨੀਆਂ ਜਿਨਾਂ ਵਿੱਚ ਲਰਸਨ ਐਂਡ ਟਰਬੋ, ਹੀਰੋ ਸਾਈਕਲ, ਵਰਧਮਾਨ, ਕੁਮਾਰ ਐਕਸਪੋਰਟਰਸ ਅਤੇ ਹੋਰ ਕੰਪਨੀਆਂ ਨੌਜਵਾਨਾਂ ਦੀ ਭਰਤੀ ਲਈ ਪਹੁੰਚੀਆਂ ਹੋਈਆਂ ਸਨ। ਇਨਾਂ ਕੰਪਨੀਆਂ ਵੱਲੋਂ ਕੁੱਲ 1677 ਆਸਾਮੀਆਂ ਜਿਨਾਂ ਵਿੱਚ ਫਿਟਰ, ਪੇਂਟਰ, ਇਲੈਕਟਰੀਸ਼ਨ, ਸੁਪਰਵਾਈਜ਼ਰ, ਮਾਰਕੀਟਿੰਗ, ਵੈਲਡਰ, ਮਸ਼ੀਨ ਆਪਰੇਟਰ, ਅਕਾਊਂਟੈਂਟ ਅਤੇ ਹੋਰ ਕੰਮਾਂ ਲਈ ਮੰਗ ਕੀਤੀ ਗਈ ਸੀ।
ਵਿਧਾਇਕ ਲੁਧਿਆਣਾ ਪੱਛਮੀ ਭਾਰਤ ਭੂਸ਼ਣ ਆਸ਼ੂ ਅਤੇ ਵਿਧਾਇਕ ਲੁਧਿਆਣਾ ਪੂਰਬੀ ਸੰਜੇ ਤਲਵਾਡ਼ ਦੇ ਨਾਲ ਵਧੀਕ ਡਾਇਰੈਕਟਰ ਤਕਨੀਕੀ ਸਿੱਖਿਆ ਅਤੇ ਇੰਡਸਟਰੀਅਲ ਟਰੇਨਿੰਗ ਦਲਜੀਤ ਕੌਰ ਸਿੱਧੂ ਨੇ ਸਾਂਝੇ ਤੌਰ ‘ਤੇ ਰੋਜ਼ਗਾਰ ਮੇਲੇ ਦਾ ਉਦਘਾਟਨ ਕੀਤਾ। ਭਾਰਤ ਭੂਸ਼ਣ ਆਸ਼ੂ ਵਿਧਾਇਕ ਨੇ ਕਿਹਾ ਕਿ ਅਜਿਹੇ ਰੋਜ਼ਗਾਰ ਮੇਲੇ ਮੁੱਖ ਮੰਤਰੀ ਪੰਜਾਬ ਕੈਪਟਨ ਅਮਰਿੰਦਰ ਸਿੰਘ ਦੇ ਘਰ-ਘਰ ਰੋਜ਼ਗਾਰ ਦੇ ਸੁਪਨੇ ਨੂੰ ਸਾਕਾਰ ਕਰਨਗੇ। ਉਨਾਂ ਕਿਹਾ ਕਿ ਬੇਰੋਜ਼ਗਾਰੀ ਨੂੰ ਖਤਮ ਕਰਨ ਦਾ ਸਹੀ ਸਮਾਂ ਹੈ ਅਤੇ ਨੌਜਵਾਨਾਂ ਨੂੰ ਇਸ ਦਾ ਵੱਧ ਤੋਂ ਵੱਧ ਲਾਭ ਉਠਾਉਣਾ ਚਾਹੀਦਾ ਹੈ।
ਐਡੀਸ਼ਨਲ ਡਾਇਰੈਕਟਰ ਤਕਨੀਕੀ ਸਿੱਖਿਆ ਅਤੇ ਇਡਸਟਰੀਅਲ ਟਰੇਨਿੰਗ ਦਲਜੀਤ ਕੌਰ ਸਿੱਧੂ ਨੇ ਦੱਸਿਆ ਕਿ ਇੰਜਨੀਰੀਅਰਿੰਗ, ਟੈਕਨੀਕਲ ਅਤੇ ਪਾਲੀਟੈਕਨਿਕ ਕੋਰਸਾਂ ਦੇ ਪਾਸ ਵਿਦਿਆਰਥੀਆਂ ਅਤੇ ਇਨਾਂ ਕੋਰਸਾਂ ਦੇ ਆਖਰੀ ਸਾਲ ਦੇ ਵਿਦਿਆਰਥੀਆਂ ਨੇ ਆਪਣੇ ਆਪ ਨੂੰ ਰੋਜਗਾਰ ਮੇਲੇ ਦੌਰਾਨ ਨੌਕਰੀ ਲਈ ਰਜਿਸਟਰਡ ਕੀਤਾ ਹੈ। ਉਨਾਂ ਦੱਸਿਆ ਕਿ ਰਾਜ ਭਰ ਵਿੱਚ ਹੁਣ ਤੱਕ ਇੱਕ ਹਜ਼ਾਰ ਵੱਖ-ਵੱਖ ਸੰਸਥਾਵਾਂ ਵੱਲੋਂ 40 ਹਜ਼ਾਰ ਤੋਂ ਵੱਧ ਨੌਕਰੀਆਂ ਦਿੱਤੀਆਂ ਜਾ ਚੁੱਕੀਆਂ ਹਨ। ਉਨਾਂ ਦੱਸਿਆ ਕਿ 5 ਮਾਰਚ ਨੂੰ ਪੰਜਾਬ ਸਰਕਾਰ ਪੱਟੀ ਜੋਨ ਵਿੱਚ ਬਾਰਡਰ ਏਰੀਏ ਵਿੱਚ ਪਹਿਲੀ ਵਾਰ ਮੈਗਾ ਜਾਬ ਫੇਅਰ ਆਯੋਜਿਤ ਕਰ ਰਹੀ ਹੈ। ਉਹਨਾਂ ਆਈ.ਟੀ.ਆਈ.ਪਾਸ ਅਤੇ ਹੋਰ ਨੌਜਵਾਨਾਂ ਨੂੰ ਅਪੀਲ ਕੀਤੀ ਕਿ ਉਹ ਆਪਣੇ ਆਪ ਨੂੰ ਨੌਕਰੀ ਲਈ ਰਜਿਸਟਰ ਕਰਨ, ਉਨਾਂ ਨੂੰ ਯੋਗਤਾ ਮੁਤਾਬਿਕ ਰੋਜਗਾਰ ਮੁਹੱਈਆ ਕਰਵਾਇਆ ਜਾਵੇਗਾ।
ਇਸ ਮੌਕੇ ਹੋਰਨਾਂ ਤੋਂ ਇਲਾਵਾ ਡਿਪਟੀ ਡਾਇਰੈਕਟਰ ਤਕਨੀਕੀ ਸਿੱਖਿਆ ਅਤੇ ਇੰਡਸਟਰੀਅਲ ਟ੍ਰੇਨਿੰਗ ਰੁਪਿੰਦਰ ਸਿੰਘ ਸਰਾਓ, ਪ੍ਰਿੰਸੀਪਲ ਆਈ.ਟੀ.ਆਈ, ਲੁਧਿਆਣਾ ਜਸਵੰਤ ਸਿੰਘ ਭੱਠਲ, ਪ੍ਰਿੰੰਸੀਪਲ ਆਈ.ਟੀ.ਆਈ, ਮੋਗਾ ਮੋਹਨ ਸਿੰਘ, ਪ੍ਰਿੰੰਸੀਪਲ ਆਈ.ਟੀ.ਆਈ, ਗੁੱਜਰਵਾਲ ਬਲਜਿੰਦਰ ਸਿੰਘ, ਪ੍ਰਿੰੰਸੀਪਲ ਆਈ.ਟੀ.ਆਈ, ਸੁਨਾਮ ਸੋਹਨ ਸਿੰਘ ਭੰਗੂ, ਪੰਜਾਬ ਪ੍ਰਦੇਸ਼ ਕਾਂਗਰਸ ਦੇ ਬੁਲਾਰੇ ਰਮਨ ਸੁਬਰਾਮਨੀਅਮ ਅਤੇ ਇਲਾਕੇ ਦੀਆਂ ਪ੍ਰਮੁੱਖ ਸ਼ਖਸ਼ੀਅਤਾਂ ਹਾਜ਼ਰ ਸਨ।