ਪੰਜਾਬ ਦੀ ਟੀਮ ਰਹੀ ਤੀਜੇ ਸਥਾਨ ‘ਤੇ
ਲੁਧਿਆਣਾ, 23 ਨਵੰਬਰ ( ਸਤ ਪਾਲ ਸੋਨੀ ) : 63ਵੀਂਆਂ ਰਾਸ਼ਟਰੀ ਸਕੂਲਾਂ ਖੇਡਾਂ, ਜੋ ਕਿ ਕੋਲਕਾਤਾ (ਪੱਛਮੀ ਬੰਗਾਲ) ਵਿਖੇ ਹੋਈਆਂ, ਵਿੱਚ ਲੁਧਿਆਣਾ ਜਿਮਨਾਸਟਿਕ ਕੋਚਿੰਗ ਸੈਂਟਰ, ਗੁਰੂ ਨਾਨਕ ਸਟੇਡੀਅਮ ਦਾ ਜਿਮਨਾਸਟ ਕੇਸ਼ਵ ਠਾਕੁਰ ਦੇਸ਼ ਦਾ ਆਲ ਰਾਊਂਡ ਤੀਜਾ ਸਰਬੋਤਮ ਜਿਮਨਾਸਟ ਚੁਣਿਆ ਗਿਆ ਹੈ। ਇਸ ਤੋਂ ਇਲਾਵਾ ਇਸ ਮੁਕਾਬਲੇ ਵਿੱਚ ਪੰਜਾਬ ਦੀ ਟੀਮ ਓਵਰਆਲ ਤੀਜੇ ਸਥਾਨ ‘ਤੇ ਰਹੀ ਹੈ। ਇਸ ਸੰਬੰਧੀ ਲੁਧਿਆਣਾ ਜਿਮਨਾਸਟਿਕ ਕੋਚਿੰਗ ਸੈਂਟਰ, ਗੁਰੂ ਨਾਨਕ ਸਟੇਡੀਅਮ ਦੇ ਕੋਚ ਪ੍ਰੇਮ ਸਿੰਘ ਨੇ ਦੱਸਿਆ ਕਿ ਪੰਜਾਬ ਵੱਲੋਂ ਭਾਗ ਲੈਣ ਵਾਲੇ ਜਿਮਨਾਸਟ ਖ਼ਿਡਾਰੀਆਂ ਵਿੱਚ ਇਸ ਕੋਚਿੰਗ ਸੈਂਟਰ ਦੇ ਕੇਸ਼ਵ ਠਾਕੁਰ ਅਤੇ ਵਿਨੋਦ ਭੱਟ ਅੰਤਰ-19 (ਲਡ਼ਕੇ) ਵਰਗ ਵਿੱਚ ਅਤੇ ਖ਼ਿਡਾਰਨ ਮੰਜੂ ਸ਼ਰਮਾ ਅੰਤਰ-19 (ਲਡ਼ਕੀਆਂ) ਵਰਗ ਵਿੱਚ ਸ਼ਾਮਿਲ ਸਨ। ਇਸ ਤੋਂ ਇਲਾਵਾ ਪੰਜਾਬ ਦੀ ਟੀਮ ਵਿੱਚ ਖੰਨਾ ਨਾਲ ਸੰਬੰਧਤ ਕ੍ਰਿਸ਼ਨ ਕੁਮਾਰ ਦੀ ਵੀ ਚੋਣ ਹੋਈ ਸੀ।
ਇਨਾਂ ਮੁਕਾਬਲਿਆਂ ਵਿੱਚ ਜਿੱਥੇ ਪੰਜਾਬ ਦੀ ਟੀਮ ਰਾਸ਼ਟਰੀ ਪੱਧਰ ‘ਤੇ ਤੀਜੇ ਨੰਬਰ ‘ਤੇ ਰਹੀ, ਉਥੇ ਹੀ ਲੁਧਿਆਣਾ ਜਿਮਨਾਸਟਿਕ ਕੋਚਿੰਗ ਸੈਂਟਰ, ਗੁਰੂ ਨਾਨਕ ਸਟੇਡੀਅਮ ਦਾ ਜਿਮਨਾਸਟ ਕੇਸ਼ਵ ਠਾਕੁਰ ਦੇਸ਼ ਦਾ ਆਲ ਰਾਊਂਡ ਤੀਜਾ ਸਰਬੋਤਮ ਜਿਮਨਾਸਟ ਚੁਣਿਆ ਗਿਆ। ਕੇਸ਼ਵ ਠਾਕੁਰ ਨੇ ਅੰਤਰ-19 ਵਰਗ ਵਿੱਚ ਚਾਰ ਕਾਂਸੀ ਦੇ ਤਮਗੇ ਜਿੱਤੇ ਜਦਕਿ ਸੈਂਟਰ ਦੇ ਹੋਰ ਜਿਮਨਾਸਟ ਵਿਨੋਦ ਭੱਟ ਚੇਤਰੀ ਨੇ ਇਸੇ ਉਮਰ ਵਰਗ ਦੇ ਟੀਮ ਵਰਗ ਵਿੱਚ ਕਾਂਸੀ ਦਾ ਤਮਗਾ ਪ੍ਰਾਪਤ ਕੀਤਾ।
ਇਥੇ ਇਹ ਦੱਸਣਯੋਗ ਹੈ ਕਿ ਬੀਤੇ ਦਿਨੀਂ ਗੁਰਦਾਸਪੁਰ ਵਿਖੇ ਆਯੋਜਿਤ ਕੀਤੀਆਂ ਗਈਆਂ 63ਵੀਂਆਂ ਪੰਜਾਬ ਰਾਜ ਸਕੂਲ ਖੇਡਾਂ-2017 ਵਿੱਚ ਵੀ ਜ਼ਿਲਾ ਲੁਧਿਆਣਾ ਦੇ ਜਿਮਨਾਸਟ ਖ਼ਿਡਾਰੀਆਂ ਨੇ ਆਪਣੀ ਸਖ਼ਤ ਮਿਹਨਤ ਦਾ ਲੋਹਾ ਮਨਵਾਉਂਦਿਆਂ ਜਿੱਥੇ ਚੈਂਪੀਅਨ ਹੋਣ ਦਾ ਮਾਣ ਪ੍ਰਾਪਤ ਕੀਤਾ ਸੀ, ਉਥੇ ਹੀ ਹੋਰ ਖ਼ਿਡਾਰੀਆਂ ਨੇ ਵੀ ਚੰਗੀਆਂ ਪੁਜੀਸ਼ਨਾਂ ਹਾਸਿਲ ਕਰਕੇ ਆਪਣੇ ਸਕੂਲ, ਕੋਚ, ਅਕਾਦਮੀਆਂ, ਮਾਪਿਆਂ ਅਤੇ ਜ਼ਿਲੇ ਦਾ ਨਾਮ ਰੋਸ਼ਨ ਕੀਤਾ ਸੀ।
ਇਸ ਤੋਂ ਪਹਿਲਾਂ ਸੂਬਾ ਪੱਧਰੀ ਖੇਡਾਂ ਵਿੱਚ ਵੀ ਜ਼ਿਲਾ ਲੁਧਿਆਣਾ ਦੀ ਅੰਤਰ-19 ਲਡ਼ਕਿਆਂ ਦੀ ਟੀਮ ਨੇ ਟੀਮ ਵਰਗ ਵਿੱਚ ਪਹਿਲਾ ਸਥਾਨ ਹਾਸਿਲ ਕੀਤਾ ਸੀ ਅਤੇ ਖ਼ਿਡਾਰੀ ਕੇਸ਼ਵ ਠਾਕੁਰ ਨੇ 8 ਸੋਨ ਤਮਗੇ ਪ੍ਰਾਪਤ ਕਰਕੇ ਆਲ ਰਾਊਂਡ ਬੈਸਟ ਜਿਮਨਾਸਟ ਆਫ਼ ਪੰਜਾਬ ਦਾ ਖ਼ਿਤਾਬ ਆਪਣੇ ਨਾਮ ਕੀਤਾ ਸੀ। ਇਸ ਤੋਂ ਇਲਾਵਾ ਅੰਤਰ-19 ਲਡ਼ਕੀਆਂ ਦੀ ਟੀਮ ਨੇ ਤੀਜਾ ਸਥਾਨ ਹਾਸਿਲ ਕੀਤਾ ਸੀ। ਕੋਚ ਪ੍ਰੇਮ ਸਿੰਘ ਨੇ ਖ਼ਿਡਾਰੀਆਂ ਨੂੰ ਉਨਾਂ ਦੀਆਂ ਪ੍ਰਾਪਤੀਆਂ ‘ਤੇ ਵਧਾਈ ਦਿੰਦਿਆਂ ਸੁਨਹਿਰੇ ਭਵਿੱਖ ਦੀਆਂ ਸ਼ੁਭਕਾਮਨਾਵਾਂ ਦਿੱਤੀਆਂ।