ਸਰਕਾਰੀ ਸਕੂਲਾਂ ਵਿੱਚ ਸਿਹਤ ਅਤੇ ਨਿਊਟ੍ਰਸ਼ੀਅਨ ਵਿਸ਼ੇ ‘ਤੇ ਕੁਇੱਜ਼ ਮੁਕਾਬਲੇ ਕੀਤੇ ਜਾਣਗੇ ਆਯੋਜਤ
ਲੁਧਿਆਣਾ, 7 ਮਾਰਚ ( ਸਤ ਪਾਲ ਸੋਨੀ ) : ਜ਼ਿਲੇ ਦੇ ਸਾਰੇ ਸਰਕਾਰੀ ਸਕੂਲਾਂ ਵਿੱਚ ਸਿਹਤ ਅਤੇ ਨਿਊਟ੍ਰਸ਼ੀਅਨ ਵਿਸ਼ੇ ‘ਤੇ ਕੁਇੱਜ਼ ਮੁਕਾਬਲੇ 8 ਮਾਰਚ ਨੂੰ ਆਯੋਜਿਤ ਕੀਤੇ ਜਾਣਗੇ ਤਾਂ ਜੋ ਵਿਦਿਆਰਥੀਆਂ ਨੂੰ ਸਿਹਤ ਪ੍ਰਤੀ ਜਾਗਰੂਕ ਕੀਤਾ ਜਾ ਸਕੇ, ਦੇਸ਼ ਦੇ ਪ੍ਰਧਾਨ ਮੰਤਰੀ ਵੱਲੋਂ ਅੰਤਰ ਰਾਸ਼ਟਰੀ ਮਹਿਲਾ ਦਿਵਸ ‘ਤੇ (8 ਮਾਰਚ) ਰਾਜਸਥਾਨ ਦੇ ਜੁਨਜੁਨੂੰ ਜ਼ਿਲੇ ਵਿੱਚ ਸਿਹਤ ਅਤੇ ਨਿਊਟ੍ਰਸ਼ੀਅਨ ਮਿਸ਼ਨ ਦੀ ਸ਼ੁਰੂਆਤ ਕੀਤੀ ਜਾ ਰਹੀ ਹੈ। ਇਸ ਮਿਸ਼ਨ ਦਾ ਮੁੱਖ ਨਿਸ਼ਾਨਾ ਨਿਊਟ੍ਰੀਸ਼ੀਅਨ ਸੰਬਧੀ ਸਮੱਸਿਆਵਾਂ ਅਤੇ ਜਨਮ ਸਮੇਂ ਬੱਚਿਆਂ ਦੇ ਘੱਟ ਭਾਰ ਦੀਆਂ ਸਮੱਸਿਆਵਾਂ ਪ੍ਰਤੀ ਜਾਗਰੂਕ ਕਰਨਾ ਹੈ।
ਜ਼ਿਲਾ ਪ੍ਰੋਗਰਾਮ ਅਫਸਰ ਰੁਪਿੰਦਰ ਕੌਰ ਨੇ ਦੱਸਿਆ ਕਿ ਇਸੇ ਮਿਸ਼ਨ ਦੀ ਲਡ਼ੀ ਤਹਿਤ ਪੌਸ਼ਟਿਕਤਾ ਅਤੇ ਪੌਸ਼ਟਿਕ ਖੁਰਾਕ ਸਬੰਧੀ ਸਕੂਲ ਦੇ ਵਿਦਿਆਰਥੀਆਂ ਨੂੰ ਸਵੇਰ ਦੀ ਪ੍ਰਾਰਥਨਾ ਸਭਾ ਦੌਰਾਨ ਜਾਗਰੂਕ ਕੀਤਾ ਜਾ ਰਿਹਾ ਹੈ। ਉਨਾਂ ਦੱਸਿਆ ਕਿ ਇਸ ਦੇ ਨਾਲ ਹੀ ਸਕੂਲ ਵਿਦਿਆਰਥੀਆਂ ਨੂੰ ਜੰਕ ਫੂਡ ਦੇ ਨੁਕਸਾਨ ਅਤੇ ਜਰੂਰੀ ਖੁਰਾਕ ਪ੍ਰਤੀ ਵੀ ਜਾਗਰੂਕ ਕੀਤਾ ਜਾ ਰਿਹਾ ਹੈ। ਇਸ ਸਬੰਧੀ ਸਕੂਲਾਂ ਵਿੱਚ ਪੋਸਟਰ ਮੁਕਾਬਲੇ ਵੀ ਕਰਵਾਏ ਗਏ। ਉਨਾਂ ਦੱਸਿਆ ਕਿ ”ਬੇਟੀ ਬਚਾਓ- ਬੇਟੀ ਪਡ਼ਾਓ” ਸਬੰਧੀ ਪੋਸਟਰ ਅਤੇ ਬੈਨਰ ਪ੍ਰਮੁੱਖ ਸਥਾਨਾਂ ‘ਤੇ ਲਗਾਏ ਗਏ ਹਨ ਤਾਂ ਜੋ ਲੋਕਾਂ ਨੂੰ ਜਾਗਰੂਕ ਕੀਤਾ ਜਾ ਸਕੇ। ਉਨਾਂ ਦੱਸਿਆ ਕਿ ਜ਼ਿਲੇ ਦੇ 16 ਬਲਾਕਾਂ ਦੀਆਂ 2487 ਆਂਗਨਵਾਡ਼ੀਆਂ ਦੇ ਸਾਰੇ ਬੱਚਿਆਂ ਦਾ ਭਾਰ ਦੀ ਜਾਂਚ ਕੀਤੀ ਗਈ ਅਤੇ ਇਸ ਸਮੇਂ ‘ਤੇ ਬੱਚਿਆਂ ਦੀਆਂ ਮਾਵਾਂ ਨੂੰ ਸੰਤੁਸ਼ਟ ਖੁਰਾਕ ਦੇ ਫਾਇਦੇ ਦਸੇ ਗਏ।
ਜ਼ਿਲਾ ਪ੍ਰੋਗਰਾਮ ਅਫਸਰ ਨੇ ਦੱਸਿਆ ਕਿ ਪ੍ਰਧਾਨ ਮੰਤਰੀ ਭਾਰਤ ਨਰਿੰਦਰ ਮੋਦੀ ਦੇ ਪ੍ਰੋਗਰਾਮ ਨੈਸ਼ਨਲ ਨਿਊਟ੍ਰੀਸ਼ੀਅਨ ਮਿਸ਼ਨ ਨੂੰ ਸਾਰੇ ਆਂਗਨਵਾਡ਼ੀ ਸੈਂਟਰ ‘ਤੇ ਦੁਪਹਿਰ 1.00 ਵਜੇ ਤੋਂ 2.30 ਵਜੇ ਤੱਕ ਦਿਖਾਇਆ ਜਾਵੇਗਾ।