ਪਟਿਆਲਾ 3175 ਨੌਕਰੀਆਂ ਨਾਲ ਦੂਜੇ ਅਤੇ ਸੰਗਰੂਰ 3068 ਨੌਕਰੀਆਂ ਨਾਲ ਤੀਜੇ ਸਥਾਨ ‘ਤੇ
ਲੁਧਿਆਣਾ, 24 ਫਰਵਰੀ ( ਸਤ ਪਾਲ ਸੋਨੀ ) : ਪੰਜਾਬ ਸਰਕਾਰ ਵੱਲੋਂ ‘ਘਰ–ਘਰ ਰੋਜ਼ਗਾਰ ਯੋਜਨਾ‘ ਤਹਿਤ ਮਿਤੀ 13 ਫਰਵਰੀ ਤੋਂ 22 ਫਰਵਰੀ ਤੱਕ ਆਯੋਜਿਤ ਕੀਤੇ ਗਏ ਰੋਜ਼ਗਾਰ ਮੇਲਿਆਂ ਦਾ ਸਭ ਤੋਂ ਵੱਧ ਲਾਭ ਜ਼ਿਲਾ ਲੁਧਿਆਣਾ ਦੇ ਬੇਰੁਜ਼ਗਾਰ ਨੌਜਵਾਨਾਂ ਨੇ ਚੁੱਕਿਆ ਹੈ। ਸਬ–ਡਵੀਜ਼ਨ ਪੱਧਰ ‘ਤੇ ਲਗਾਏ ਗਏ ਇਨਾਂ ਮੇਲਿਆਂ ਵਿੱਚ ਜ਼ਿਲਾ ਲੁਧਿਆਣਾ ਨੇ 5201 ਨੌਕਰੀਆਂ ਦੇ ਕੇ ਪਹਿਲਾ ਸਥਾਨ ਹਾਸਿਲ ਕੀਤਾ, ਜਦਕਿ 3175 ਨੌਕਰੀਆਂ ਦੇ ਕੇ ਜ਼ਿਲਾ ਪਟਿਆਲਾ ਦੂਜੇ ਅਤੇ 3068 ਨੌਕਰੀਆਂ ਦੇ ਕੇ ਜ਼ਿਲਾ ਸੰਗਰੂਰ ਤੀਜੇ ਸਥਾਨ ‘ਤੇ ਰਹੇ। ਇਸ ਸੰਬੰਧੀ ਜਾਣਕਾਰੀ ਦਿੰਦਿਆਂ ਡਿਪਟੀ ਕਮਿਸ਼ਨਰ ਪ੍ਰਦੀਪ ਕੁਮਾਰ ਅਗਰਵਾਲ ਨੇ ਦੱਸਿਆ ਕਿ ਸੂਬੇ ਭਰ ਵਿੱਚ ਲਗਾਏ ਗਏ ਇਨਾਂ ਮੇਲਿਆਂ ਵਿੱਚ 40517 ਨੌਜਵਾਨਾਂ ਨੂੰ ਨੌਕਰੀ ਮਿਲੀ, ਜਦਕਿ 6149 ਬੇਰੁਜ਼ਗਾਰਾਂ ਨੂੰ ਵੱਖ–ਵੱਖ ਨੌਕਰੀਆਂ ਲਈ ਸ਼ਾਰਟਲਿਸਟ ਕੀਤਾ ਗਿਆ ਹੈ। ਇਸ ਤੋਂ ਇਲਾਵਾ 4070 ਨੌਜਵਾਨਾਂ ਵੱਲੋਂ ਆਪਣਾ ਕਾਰੋਬਾਰ ਸ਼ੁਰੂ ਕਰਨ ਦੀ ਵੀ ਇੱਛਾ ਪ੍ਰਗਟਾਈ ਗਈ ਹੈ।
ਉਨਾਂ ਕਿਹਾ ਕਿ ਜ਼ਿਲਾ ਲੁਧਿਆਣਾ ਵਿੱਚ ਲਗਾਏ ਇਨਾਂ ਮੇਲਿਆਂ ਦੌਰਾਨ 280 ਨੌਕਰੀ ਦਾਤਿਆਂ (ਇੰਪਲਾਇਰਜ਼) ਵੱਲੋਂ 32400 ਨੌਕਰੀਆਂ ਦੀ ਪੇਸ਼ਕਸ਼ ਕੀਤੀ ਗਈ ਸੀ। ਇਨਾਂ ਨੌਕਰੀਆਂ ਲਈ ਕੁੱਲ 11841 ਬੇਰੁਜ਼ਗਾਰਾਂ ਨੇ ਭਾਗ ਲਿਆ। ਕੁੱਲ 5201 ਬੇਰੁਜ਼ਗਾਰਾਂ ਨੂੰ ਨੌਕਰੀਆਂ ਮਿਲਣ ਦੇ ਨਾਲ–ਨਾਲ 14 ਬੇਰੁਜ਼ਗਾਰਾਂ ਨੇ ਸਵੈ–ਰੋਜ਼ਗਾਰ ਲਈ ਆਪਣੀ ਰਜਿਸਟ੍ਰੇਸ਼ਨ ਕਰਵਾਈ। ਇਸ ਤਰਾਂ ਇਨਾਂ ਮੇਲਿਆਂ ਵਿੱਚ ਭਾਗ ਲੈਣ ਵਾਲੇ ਬੇਰੁਜ਼ਗਾਰਾਂ ਦੀ ਗਿਣਤੀ ਵਿੱਚ ਵੀ ਜ਼ਿਲਾ ਲੁਧਿਆਣਾ ਦੀ ਝੰਡੀ ਰਹੀ। ਉਨਾਂ ਜ਼ਿਲਾ ਲੁਧਿਆਣਾ ਵਿੱਚ ਲਗਾਏ ਸਬ–ਡਵੀਜ਼ਨ ਪੱਧਰੀ ਮੇਲਿਆਂ ਦਾ ਵੇਰਵਾ ਦਿੰਦਿਆਂ ਦੱਸਿਆ ਕਿ ਲੁਧਿਆਣਾ ਦੇ ਟੀ. ਸੀ. ਕੇ. ਟੀ. ਇੰਸਟੀਚਿਊਟ ਵਿਖੇ ਲਗਾਏ ਗਏ ਲੁਧਿਆਣਾ (ਪੂਰਬੀ) ਰੋਜ਼ਗਾਰ ਮੇਲੇ ਵਿੱਚ ਸਭ ਤੋਂ ਵਧੇਰੇ 1706 ਬੇਰੁਜ਼ਗਾਰਾਂ ਨੂੰ ਰੋਜ਼ਗਾਰ ਦਿੱਤਾ ਗਿਆ, ਜਦਕਿ ਰਾਏਕੋਟ ਵਿਖੇ 833, ਖੰਨਾ ਵਿਖੇ 768, ਆਈ. ਟੀ. ਆਈ. ਲੁਧਿਆਣਾ (ਪੱਛਮੀ) ਵਿਖੇ 620, ਜਗਰਾਂਉ ਵਿਖੇ 604, ਸਮਰਾਲਾ ਵਿਖੇ 439 ਅਤੇ ਪਾਇਲ ਵਿਖੇ 231 ਨੌਜਵਾਨਾਂ ਨੂੰ ਰੋਜ਼ਗਾਰ ਮਿਲਿਆ।
ਉਨਾਂ ਬੇਰੋਜ਼ਗਾਰ ਨੌਜਵਾਨਾਂ ਨੂੰ ਅਪੀਲ ਕੀਤੀ ਕਿ ਉਹ ਆਪਣੇ– ਆਪ ਨੂੰ ਵੈਬਸਾਈਟwww.ghargharrozgar.punjab.gov.in ‘ਤੇ ਰਜਿਸਟਰਡ ਕਰਨ ਤਾਂ ਜੋ ਆਉਣ ਵਾਲੇ ਸਮੇਂ ਦੌਰਾਨ ਲਗਾਏ ਜਾਣ ਵਾਲੇ ਰੋਜ਼ਗਾਰ ਮੇਲਿਆਂ ਵਿੱਚ ਪਹਿਲ ਦੇ ਅਧਾਰ ‘ਤੇ ਮੌਕਾ ਦਿੱਤਾ ਜਾ ਸਕੇ। ਇਨਾਂ ਰੋਜ਼ਗਾਰ ਮੇਲਿਆਂ ਨੂੰ ਸਫ਼ਲ ਕਰਨ ਲਈ ਉਨਾਂ ਸਾਰੇ ਅਧਿਕਾਰੀਆਂ ਅਤੇ ਸਟਾਫ਼ ਦਾ ਧੰਨਵਾਦ ਕੀਤਾ।